ЭРХЭМ ХАРИЛЦАГЧ ТАНД ШИНЭ 7 ХОНОГИЙН МЭНД ХҮРГЭЕ!

Хөрөнгө оруулалтын оновчтой шийдвэр гаргалтад тань туслах үнэн бодит мэдээлэл, судалгаа шинжилгээнд суурилсан “Тоймлоё - Эдийн засаг, зах зээл, боломжууд” товхимлыг хүргүүлж байна.

ӨНГӨРСӨН 7 ХОНОГИЙН ОНЦЛОХ МЭДЭЭ

• SpaceX‑ийн хиймэл оюуны нэгжийн орлого 2031 он гэхэд 100 дахин өсөж, нийт орлого нэг их наяд ам.доллар давах төлөвтэйг шинжээчид таамаглаж байна.
• Монголбанк 2026 оны 5 дугаар сард 758.5 кг үнэт металл худалдан авч, оны эхнээс нийт худалдан авалт 5 тоннд хүрч, өмнөх оны мөн үеэс 17.4%-иар нэмэгдлээ.
• “Эрдэнэ ресурс девелопмент корпорэйшн”-ийн нийт хувьцааны тоо 66,667 ширхгээр нэмэгдэж, үнэт цаасны бүртгэлд өөрчлөлт орууллаа.
• SK Hynix санах ойн чипийн хүчин чадлаа хоёр дахин нэмэгдүүлэхээр төлөвлөсөн ч нийлүүлэлтийн хомсдол 2030 он хүртэл үргэлжлэх эрсдэлтэйг онцоллоо.
• “Монголын хөрөнгийн бирж” ХК нь "Зах зээл үүсгэгчийн үйл ажиллагааны журам"-ыг шинэчлэн баталж, олон улсын жишигт нийцүүлэн сайжрууллаа.
• Санхүүгийн зохицуулах хорооны 20 жилийн ойн хүрээнд “Мэдлэгээ дээшлүүлье–Санхүүгээ удирдъя” уриатай санхүүгийн салбарын нээлттэй өдөрлөг Сүхбаатарын талбайд зохион байгуулагдлаа.
• Банкны тухай хуульд нэмэлт, өөрчлөлт оруулах хуулийн төслийн талаарх олон нийтийн хэлэлцүүлэг зохион байгуулагдлаа.

✨ ХӨРӨНГӨ ОРУУЛАЛТЫН БОЛОМЖУУД

🏆 Үнэт цаасны давуу тал: 

​

✅  Хөрөнгөө найдвартай өсгөх боломж

✅  Хөрвөх чадвар өндөр – Богино хугацаанд эзэмших боломжтой

✅  Хүүгийн төлөлт тогтмол – Та хүлээн авсан хүүгийн орлогоо дахин хөрөнгө оруулалт хийх замаар өгөөжийн түвшнийг нэмэгдүүлэх боломжтой.

✅  Хадгаламжийн хүүтэй харьцуулахад жилийн дунджаар 7 нэгж хувиар өндөр өгөөж

✅  Барьцаа, баталгаатай

✅  Мэргэжлийн зохицуулах байгууллагуудын хатуу, хяналт шалгалтын дараа хөрөнгө оруулагчдад санал болгож буй бүтээгдэхүүн

👉Та доорх холбоос дээр дарж мэдээллээ оруулснаар манай хөрөнгө оруулалтын мэргэшсэн зөвлөхүүд тань руу холбогдож үнэт цаасны дэлгэрэнгүй мэдээлэл болон арилжаанд оролцох заавар хүргэх болно.

​

📞 Холбоо барих: 7010-0261, 8008-8704, 8072-2433, 8000-3148

ДОТООД ЗАХ ЗЭЭЛИЙН ТОЙМ

МУ-ЫН ХӨРӨНГИЙН ЗАХ ЗЭЭЛД ӨНГӨРСӨН 7 ХОНОГТ ЯМАР ӨӨРЧЛӨЛТҮҮД ГАРСАН БЭ?

• Монгол Улсын хувьцааны зах зээлийг төлөөлөх ТОП-20 индекс өнгөрөгч 7 хоногт уналттай байлаа. Тодруулбал, Монголын хөрөнгийн биржийн ТОП-20 индекс  51,347.33 нэгжид хүрч 0.02 хувийн уналттай хаагдлаа. 

• Мөн өнгөрсөн долоо хоногийн хугацаанд МХБ нийт 9,657 хэлцэл гүйцэтгэсэн ба хөрөнгийн зах зээлийн нийт үнэлгээ 13,373.05 тэрбум төгрөг болжээ.

• "Эрдэнэт авто зам" ХК-ийн хувьцааны үнэ долоо хоногийн 15.00 хувиар өсөж, өнгөрсөн долоо хоногийн хамгийн их өсөлттэй хувьцаагаар тодров. Харин "Нэхээсгүй эдлэл" ХК-ийн ханш -15.00 хувиар унаж, өнгөрсөн долоо хоногийн хамгийн их уналттай хувьцаа боллоо.

МУ-ЫН ЭДИЙН ЗАСГИЙН ХУВЬД ӨНГӨРСӨН 7 ХОНОГТ БОЛСОН ОНЦЛОХ ҮЙЛ ЯВДЛЫН ТОЙМ

ОЛОН УЛСЫН ЗАХ ЗЭЭЛИЙН ТОЙМ 🌍

Өнгөрсөн долоо хоног АНУ-ын хөрөнгийн зах зээл өндөр хэлбэлзэлтэй өнгөрч, геополитикийн нөхцөл байдал болон газрын тосны үнийн савлагаа хөрөнгө оруулагчдын анхаарлын төвд байлаа. Тухайн хөрөнгийн зах зээлийг төлөөлөх индексүүд болох S&P 500, Dow Jones, Nasdaq тав дахь долоо хоногтоо дараалан уналттайгаар арилжаалагдлаа. 

Инфляцын дарамт нэмэгдэж, компаниудын зардал 10 сарын дээд түвшинд хүрсэн нь шинжээчдийн санааг зовоож байна. Үнийн өсөлт 2022 оноос хойших хамгийн хурднаар нэмэгдсэн бол ажилгүйдлийн даатгалын шинэ мэдүүлэг тогтвортой хэвээр үлдсэн ч хэрэглэгчдийн итгэлийн индекс буурч, инфляцын хүлээлт 3.8% болж өссөн нь хэрэглээний эрсдэлийг нэмэгдүүлэв.

Бондын зах зээлд өгөөжүүд геополитик болон газрын тосны үнийн өсөлтийн нөлөөгөөр савлаж, ХНС-ийн дахин хүү өсгөх эрсдэлийг зах зээл тооцож эхэлсэн шинжтэй байгааг шинжээчид онцолж байна.

Европын хувьцааны зах зээл өнгөрсөн долоо хоногт өсөлттэй хаагдсан ч геополитикийн тодорхойгүй байдал болон түүхий эдийн үнийн савлагаа хөрөнгө оруулагчдын сэтгэлзүйд дарамт үзүүлсээр байна. Эрчим хүчний үнэ өсөж буй энэ үед Европын Төв Банк шаардлагатай бол аливаа хуралдаанаар бодлогын хүүг өөрчлөхөд бэлэн байгаагаа мэдэгдсэн нь зах зээлд болгоомжлол нэмэгдүүлэв.

Германд бизнесийн итгэлцэл 2025 оноос хойших хамгийн доод түвшинд хүрсэн ч үйлдвэрлэлийн PMI бага зэрэг сэргэж, үйлдвэрлэлийн салбарт эерэг дохио өглөө. Харин Еврозоны нийлмэл PMI 3-р сард буурч, шинэ захиалгын уналт болон хангалтын сүлжээний тасалдлууд эдийн засгийн өсөлт саарах эрсдэлийг тодотголоо.

OECD-ийн шинэ таамаглал эдийн засгийн төлөвийг сөргөөр таамаглаж байгаа хэвээр байгааг бататгаж, 2026 оны өсөлтийн төсөөллийг Еврозонд 0.8%, Их Британид 0.7% болгон бууруулсан байна. Их Британийн инфляц 3%-д тогтвортой байгаа ч Ираны дайнаас үүдэлтэй эрчим хүчний үнийн огцом өсөлт одоогоор тооцогдоогүй тул инфляцын дарамт нэмэгдэх эрсдэл хэвээр байгааг онцоллоо.

Японы хөрөнгийн зах зээл өнгөрсөн долоо хоногийг холимог гүйцэтгэлтэй хааж, Nikkei 225 өөрчлөгдөөгүй бол TOPIX 1.1%-иар өсөв. Газрын тосны өндөр үнэ болон Ойрх Дорнодын мөргөлдөөн нь импортын эрчим хүчинд ихээхэн хамааралтай Японы эдийн засагт дарамт үзүүлж, бизнесийн зардлыг нэмэгдүүлэн өсөлтийг удаашруулах, өрхийн хэрэглээг шахах эрсдэлийг нэмэгдүүлж байна.

Ам.долларын эсрэг иений ханшийн сулрал үргэлжилж 160 луу дөхсөн нь 2024 онд интервенц хийж байсан шугамтай ойрхон тул дахин арга хэмжээ авах эрсдэлийг нэмэгдүүлэв. Сангийн сайд валютын спекуляцийн нөлөөг онцлон, шаардлагатай тохиолдолд “эрс шийдэмгий алхам” хийхэд бэлэн гэдгээ мэдэгдсэн нь хөрөнгө оруулагчдын анхаарлыг татлаа.

Эдийн засгийн талаас авч үзвэл, суурь инфляц 1.6% болж буурсан нь эрчим хүчний татаасны нөлөөтэй болохыг эдийн засагчид онцоллоо. Гэвч газрын тосны үнэ өссөөр байгаа тул инфляц дахин нэмэгдэх дарамт хэвээр байгаа тул Төв банк тогтвортой инфляцыг хангах гол хүчин зүйл нь бодит цалингийн өсөлт байх ёстойг дахин онцлов.

Хятадын хөрөнгийн зах зээл өнгөрсөн долоо хоногт бууралттай хаагдсан бөгөөд нефтийн үнийн өсөлт, Ойрх Дорнодын мөргөлдөөний эрсдэл эрчим хүчний зардлыг нэмэгдүүлнэ гэсэн хүлээлт голлон нөлөөлөв. Эрчим хүчний үнийн дарамтыг зөөлрүүлэх зорилгоор засгийн газар дотоодын бензин, дизелийн үнийн өсөлтийг хязгаарлаж, боломжит нэмэгдлийг тал хувиар бууруулах шийдвэр гаргасан нь олон нийтийн анхаарлыг татлаа.

Гадаад худалдааны тал дээр Хятад улс АНУ-ын нийлүүлэлтийн сүлжээ болон сэргээгдэх эрчим хүчний бодлогод шалгалт эхлүүлснээр хоёр талын худалдааны хурцадмал байдал дахин нэмэгдэв. Эдийн засгийн үзүүлэлтээс харахад, Ойрх Дорнодын мөргөлдөөн эхлэхээс өмнө Хятадын томоохон үйлдвэрлэлийн компаниудын ашиг 2026 оны эхний хоёр сард 15%-иар өссөн нь салбаруудын сэргэлт жигд бус байгааг харуулж байна.

МАКРО ҮЗҮҮЛЭЛТҮҮД ТАРХАХ ХУВААРЬ | 2026.06.08 - 06.12

🔎 ОНЦЛОХ ШИНЖИЛГЭЭ

Банкны тухай хуулийн шинэчлэл санхүүгийн зах зээлд юу өөрчилж болох вэ?

Банкны тухай хуулийн шинэчлэл дахин хэлэлцэгдэж эхэлсэн нь банкны салбарын эрх зүйн зорилго болон зах зээлийн бодит багтаамж хоорондын зөрүү ил тод болж байгааг харуулж байна. Монгол Улсад банкны салбар нийт санхүүжилтийн дийлэнхийг бүрдүүлдэг хэвээр байгаа бөгөөд Монголбанкны мэдээллээр банкны салбарын нийт актив нь ДНБ‑ий ойролцоогоор 90 орчим хувь‑д хүрсэн байна. Ийм нөхцөлд банкны тухай хуульд орох аливаа өөрчлөлт нь зөвхөн салбарын дотоод зохицуулалт бус, эдийн засгийн санхүүжилтийн ерөнхий орчинд шууд нөлөөлнө.

Гол сорилт нь хөрөнгийн зах зээлийн багтаамж юм. СЗХ‑ны статистикаас харахад Монголын хөрөнгийн зах зээлийн нийт үнэлгээ болон өдөр тутмын арилжааны дундаж эргэлт нь бүс нутгийн орнуудтай харьцуулахад харьцангуй бага түвшинд байна. Ийм нөхцөлд банкны салбарт шаардагдах том хэмжээний хувьцааны нийлүүлэлт богино хугацаанд зах зээлд дарамт үүсгэх, үнэлгээг бууруулах эрсдэлтэй. Энэ нь санхүүгийн зах зээлийн тогтвортой байдалд сөргөөр нөлөөлөх магадлалтай.

Нөгөө талаас, шинэчлэлийг хойшлуулах эсвэл зөөлрүүлэх нь өмнөх реформын үр дүнг сааруулах эрсдэл дагуулна. Өмчлөлийн төвлөрөл, засаглал, ил тод байдал сул хэвээр үлдвэл банкны салбарын системийн эрсдэл хуримтлагдах боломжтой. Тиймээс бодлогын түвшинд үе шаттай, зах зээлийн бодит үзүүлэлттэй уялдсан зохицуулалт хэрэгжүүлэх нь хамгийн оновчтой хувилбар гэж үзэж байна.

🧑‍🏫 ТАНЫ МЭДЛЭГТ | Банкны тухай хууль өөрчлөгдөхөд зах зээлд яаж нөлөөлдөг вэ?

Банкны тухай хууль нь санхүүгийн зах зээлийн зангилаа зохицуулалт юм. Учир нь Монголын эдийн засагт бизнес, өрх, төрийн санхүүжилтийн ихэнх хэсэг банкны системээр дамждаг. Тиймээс хуульд орох өөрчлөлт нь шууд бус замаар бүх салбарт нөлөөлнө.

 1. Зээлийн нөхцөл

Капитал, эрсдэлийн шаардлага өөрчлөгдвөл банкны зээлийн шалгуур, хүү, хугацаанд нөлөөлдөг. Энэ нь ялангуяа ЖДҮ болон томоохон төсөлд мэдрэгддэг.

 2. Хөрөнгийн зах зээлийн идэвх

Банкнуудын хувьцаа, бонд нь зах зээлийн хамгийн том, чанартай хэрэгслүүдийн нэг. Зохицуулалт уялдаатай байвал зах зээлийн гүнзгийрэлд эерэг нөлөөтэй.

 3. Хадгаламж ба итгэл

Банкны тогтвортой байдал сайжрах тусам хадгаламж эзэмшигчдийн итгэл нэмэгдэж, санхүүгийн системийн суурь бэхэжнэ.

 4. Томоохон төслийн санхүүжилт

Урт хугацааны, их хэмжээний санхүүжилт татах боломж нь банкны салбарын зохицуулалттай шууд холбоотой.

⚠️ Мэдэгдэл: Энэхүү мэдээлэл нь “Ти Ди Би Секьюритис ҮЦК” ХХК-ийн нэрийн өмнөөс зөвхөн харилцагчдад мэдээлэл хүргэх зорилготой бөгөөд аливаа хөрөнгө оруулалтын зөвлөгөө, үнэт цаас худалдах, худалдан авах санал биш юм. Мэдээллийн үнэн бодит байдалд шаардлагатай хяналт хийгдсэн ч баталгаа өгөхгүй. Уг мэдээллийг ашигласнаас үүссэн аливаа хохиролд “Ти Ди Би Секьюритис ҮЦК” ХХК хариуцлага хүлээхгүй болно.